القصة الكاملة للاعتداء على نجل سامي مغاوري ووالدته من أمن هايبر بسبب السكر

فاجئ كريم نجل الفنان سامي مغاوري، جمهوره بنشر مقطع فيديو يوثق خلاله لحظة الاعتداء عليه هو ووالدته من قبل أمن هايبر متواجدين فيه، عبر حسابه الرسمي، بموقع تبادل التواصل الاجتماعي فيسبوك.

وقال كريم، خلال الفيديو : فضيحة هايبر وان الشيخ زايد، بيخبوا السكر من الناس تحت مكنة الكاشير وبيقولوا خلص، الڤيديو واضح قدامكم صوت وصورة، ولما واجهتهم بالڤيديو شفنا كمية بلطجة من الأمن عندهم كبيرة جدًا بقيادة مدير أمن هايبر م.ش والجاردات بتوعه.

وتابع: يعني إحنا مقاطعين كارفور وسبينس وأي ماركت أجنبي، والمنتجات الأجنبية بس الماركت المصري الكبير زي هايبر وان اللي بيحصل فيه ده غش، ومينفعش يتسكت عليه، ومفيش محاسبة، وطلبوا مني احذف الڤيديو إمبارح لأن بلطجية أمن هايبر الجاردات كانوا محاوطني، بس كنت أصلا رفعته على عشان عارف أن هيجبروني امسحه.

وأضاف: أنا ووالدتي تم الاعتداء علينا، ووالدتي بتنزف دم من مناخيرها، من إمبارح وحقها هيجي بالقانون إن شاء الله لأن الناس المحترمة، متمدش إيدها على ست مهما حصل، لكن لأنهم ناس منعدمة الضمير وكانوا عايزين يراضوني، ونلم الليلة بـ20 كيلو سكر، أنا رفضت، وبجد مكان زي ده أولى بالمقاطعة، أنا لو دخلت كارفور أو سبينس هيتضربلي تعظيم سلام، وحاجتي تجيلي لحد عندي وباحترام، لكن أماكن بتشغل همج وسفلة وبلطجية مينفعش نتعامل معاها.

وأكد: ده يعتبر بلاغ لوزارة التموين، ولكل جهة مسئولة، وكل شخص عنده ضمير، لازم يكشف فضيحة هايبر وان الشيخ زايد، اللي بيمنعوا سكر وزارة التموين عن الناس.